Samantha, þriggja barna móðir, fór frá heimili sínu í Ballarat í Viktoríufylki í Ástralíu klukkan sjö að morgni og hugðist fara út að skokka.
Ekkert hefur spurst til hennar síðan þá og hefur lögregla ekki útilokað að henni hafi verið rænt. Lögregla hefur einnig skoðað hvort hún hafi mögulega fallið ofan í gömul námugöng sem vitað er um í nágrenninu en leit hefur engan árangur borið.
Sjá einnig: Rannsaka voveiflegt hvarf þriggja barna móður – Hvað varð um Samönthu?
Í frétt News.com.au kemur fram að lögregla sé orðin afar svartsýn á að Samantha finnist á lífi. Telur Mark Hatt, yfirlögregluþjónn á svæðinu, að lögregla sé að leita að líki úr því sem komið er.
Enginn hefur verið handtekinn í tengslum við málið en lögregla hefur rætt við nánustu aðstandendur Samönthu í þeirri von að varpa ljósi á hvarfið. Eiginmaður hennar hefur meðal annars verið skoðaður sérstaklega en hann er ekki grunaður um aðild að hvarfinu.
„Við höfum rætt við marga og fjölskylda hennar hefur verið mjög samvinnufús,“ segir Mark.
Hann segir að lögregla vinni út frá þeirri kenningu að henni hafi verið rænt. „Við rannsökum málið með opnum hug en það er líklegast að einhver hafi komið að hvarfi hennar. Miðað við þá umfangsmiklu leit sem hefur farið fram – þar sem ekkert hefur fundist – þá er hægt að útiloka að hún hafi orðið fyrir einhverjum bráðum veikindum.“