Bandaríkjamaðurinn John Cheeks trúði vart sínum eigin augum þegar hann fór á netið þann 8. janúar síðastliðinn og sá að lottótölurnar hans höfðu komið upp í útdrætti Powerball-lottósins kvöldið áður.

Cheeks bar tölurnar á miðanum saman við tölurnar á heimasíðu lottósins og jú, þetta voru sannarlega sömu tölurnar: 07, 15, 23, 32, 40 og ofurtalan sem var 02.

Potturinn var býsna stór, 340 milljónir dollara, eða 47 milljarðar króna, og er óhætt að segja að Cheeks hafi lagst sáttur á koddann þetta kvöld. Hann fékk þó ákveðið áfall þegar hann reyndi að leysa vinninginn út þann 10. janúar því þá var honum sagt að enginn vinningur væri á miðanum.

Þegar málið var skoðað nánar kom í ljós að verktaki sem sér um að setja vinningstölurnar á netið setti rangar tölur inn þar sem þær voru í heila þrjá daga. Í sjálfum drættinum komu aðrar tölur upp úr pottinum en einhver fljótfærnismistök virðast hafa orðið til þess að rangar tölur – vinningstölur Cheeks – fóru inn.

Richard Evans, lögmaður Cheeks, hefur stefnt lottóinu og vill hann að umbjóðandi hans fái bætur vegna málsins. Cheeks á miðann ennþá og geymir hann á öruggum stað í öryggishólfi ef allt fer á besta veg.

Óvíst er þó hvort hann fái eitthvað fyrir sinn snúð en bandarískt réttarkerfi á það til að vera óútreiknanlegt og því kannski aldrei að vita.

Vinningurinn gekk því ekki út þennan örlagaríka dag í janúarbyrjun og hélt áfram að vaxa. Það var svo þann 6. febrúar síðastliðinn að heppinn miðaeigandi hirti allan pottinn sem var kominn í 754 milljónir dollara, rúma 100 milljarða króna.