Kjörinn fulltrúi í Vermont ríki Bandaríkjanna hefur beðist afsökunar á framkomu sinni í garð samstarfsfélaga. Þingkonan Mary Morrissey situr í fulltrúaþingi Varmont og kemur úr flokki Repúblikana. Hún hafði stundað það nokkra hríð að hella vatni ofan í tösku demókratans, Jim Carroll.

Carroll fékk alveg nóg af athæfinu og náði loks að standa Morrissey að verki sem hefur nú beðist opinberlega afsökunar á athæfi sínu.

„Ég skammast mín verulega fyrir hegðun mína,“ sagði Morrissey um þessa vanvirðandi framkomu sína. Hún hefur líka beðið Carroll persónulega afsökunar og segist ætla að bæta ráð sitt með því að eiga í farsælu samstarfi við Carroll næstu misseri. Carroll sagði í samtali við AP fréttastofuna, að honum heyrist afsökunarbeiðnin einlæg, en þó þurfi að hafa í huga að ekki var um einangrað tilvik að ræða heilu mánuðina af hrellingum.

„Í fimm mánuði gekk ég í gegnum þetta,“ sagði Carroll sem tók fram að Morrissey hafði í öllum tilvikum val og í öllum tilvikum valdi hún að hella vatni ofan í tösku hans. „Hún var að kvelja mig“

Um er að ræða töskupoka (e. tote bag) úr taui sem Carroll hengir upp á göngunum í þinghúsinu þar sem hann starfar. Nokkrum sinnum á viku, í janúar og febrúar, kom hann að töskunni gegnblautri. Þá var Carroll ákærður fyrir ölvunarakstur og sendur í meðferð. Þegar hann sneri aftur til starfa var taska hans gegnsósa á hverjum degi. „Þetta var viðstöðulaust,“ sagði Carroll og bætti við að honum hafi fljótt fari að gruna Morrissey um athæfið, enda hafði hún haft horn í síðu hans um langa hríð. Hann hafi því komið falið myndavél til að standa bleytu-þrjótinn að verki. Á upptöku sást Morrissey hella úr glasi í töskuna daglega frá 23. apríl til 26. apríl.

Morrissey neitaði að tjá sig þegar eftir því var leitað og því liggur ekki fyrir hvers vegna hún tók upp á þessu.