Vísindamenn við Cambridge háskólann eru nú að skoða hluti sem geta leitt til þess að hægt verður að meðhöndla krabbamein með nýjum „róttækum“ aðferðum.

Meðal þess sem þeir vinna að er þróun prófs sem vonast er til að geti greint frumubreytingar á byrjunarstigi. Það myndi veita læknum lengri tíma til að bjóða sjúklingum upp á meðferð.

The Guardian skýrir frá þessu og segir að það séu vísindamenn við Early Cancer Institute sem vinna að þessu og vonist til að geta greint frumubreytingar mörgum árum áður en þær þróast yfir í æxli.

Þetta verkefni ef afrakstur rannsóknar sem bendir til að margir þrói með sér frumstig krabbameins sem liggur síðan í dvala um langa hríð. The Guardian hefur eftir Rebecca Fitzgerald, prófessor og forstjóra Early Cancer Institute, að krabbamein geti legið í dvala árum saman, stundum jafnvel í einn eða tvo áratugi.

„Þá komast læknar að því að þeir eru að berjast við æxli sem er búið að dreifa úr sér um líkama sjúklingsins á þessum tímapunkti. Við þurfum að finna aðra aðferð, þar sem við getum fundið fólk, sem á á hættu að fá krabbamein, snemma með prófum sem er hægt að nota á fjölda fólks,“ sagði Fitzgerald.

Vísindamenn vonast til að ef hægt verður að sjá þróunina í frumunum snemma, verði hægt að stöðva eða halda aftur af frekari þróun þess og þá hafi læknar möguleika á að grípa fyrr inn í, áður en krabbameinið breiðist út.