Rússneskir ríkisborgarar virðast í auknum mæli vilja setjast að í Suður-Kóreu ef marka má umsóknir þeirra um hæli í landinu á síðasta ári.

Alls sóttu 5.750 Rússar um hæli í Suður-Kóreu árið 2023, samkvæmt tölum sem CNN vitnar til.

Þetta er fimm sinnum meiri fjöldi en árið 2022 þegar 1.038 Rússar sóttu um hæli í landinu og meiri fjöldi en samanlagt árin 1994 til 2019. Eru rússneskir ríkisborgarar fjölmennasti hópur hælisleitenda í Suður-Kóreu en þar á eftir koma ríkisborgarar Kasakstan, Kína og Malasíu.

Í umfjöllun CNN kemur fram að þessi þróun hafi haldið áfram í byrjun árs 2024 og voru Rússar fjölmennasti hópur hælisleitenda í Suður-Kóreu í janúarmánuði.

Innflytjendastefna suðurkóreskra yfirvalda er ströng og til marks um það hefur einungis 4.052 hælisleitendum verið veitt hæli af þeim 103 þúsund sem hafa sótt um síðastliðin 30 ár. Íbúar Suður-Kóreu eru tæplega 52 milljónir.