Framleiðandi Mars súkkulaðisins vinsæla hefur ákveðið að gera tilraun með að selja súkkulaðið í pappírsumbúðum í staðinn fyrir hefðbundnar plastumbúðir. Markmiðið er auðvitað að draga úr plastnotkun en fyrirtækið stefnir að því að draga úr plastnotkun sinni um þriðjung til skamms tíma litið.

Sky News skýrir frá þessu og segir að súkkulaði í pappírsumbúðum verði selt í verslunum Tesco í Bretlandi í tilraunaskyni.

Framleiðandinn, Mars Wrigley UK, segir að stefna þess sé að allar umbúðir þess verði endurvinnanlegar, endurnýtanlegar eða nothæfar til jarðvegsgerðar. Þessi tilraun sé liður í rannsókn fyrirtækisins á hvaða umbúðir geti hentað.

Áskorunin sem fyrirtækið stendur frammi fyrir er að finna umbúðir sem eru umhverfisvænar en tryggja um leið matvælaöryggi og gæði matvælanna.