Fyrir tæpum tíu árum hvarf flug MH370 þegar það var á leið frá Kuala Lumpur í Malasíu til Peking í Kína. Vélin hvarf algjörlega sporlaust og er hvarf hennar enn óleyst. Um borð voru 239 manns.

Nú er réttarhöld hafin í Kína vegna málsins en fjölskyldur 40 farþega, sem voru flestir Kínverjar, hafa höfðað mál og krefjast meðal annars bóta.

Einn þeirra sem hafa höfða mál er Jiang Hui en móðir hans var um borð í vélinni. Hún var sjötug. Í samtali við CNN sagði hann að þær fjölskyldur sem neituðu að semja um bætur fyrir tíu árum hafi ekki enn fengið bætur né afsökunarbeiðni.

Jiang Hui hefur höfðað mál á hendur Malaysia Airlines, sem átti flugvélina, tryggingafélagi flugfélagsins, Boeing og framleiðanda hreyfla flugvélarinnar.

Auk þess að krefjast bóta, opinberrar afsökunar og sálfræðiaðstoðar fyrir ættingja þeirra sem voru í vélinni krefst hann þess að sérstakur sjóður verði settur á laggirnar til að fjármagna leit að vélinni.

CNN segir að kröfur fjölskyldnanna séu ansi líkar en þó sé smávegis munur á þeim.

Ekki liggur ljóst fyrir hvað gerist ef kínverski dómstóllinn fellst á kröfur fjölskyldnanna því hin stefndu fyrirtæki eru öll alþjóðleg fyrirtæki með höfuðstöðvar utan Kína.  Sum þeirra eru þó með starfsstöðvar í Kína.

Af þeim 239 sem voru um borð, voru 153 kínverskir ríkisborgarar.

Þær fjölskyldur sem gerðu samning á sínum tíma fengu sem svarar til rúmlega 40 milljóna íslenskra króna í bætur.