Fornleifafræðingar í Kasakstan hafa fundið 3.800 ára gamlar rústir sem þeir segja vera af pýramída. Hann er öðruvísi en hinir hefðbundnu egypsku pýramídar því ytri veggir hans eru sérstakir að því leyti að þeir eru sexhyrndir og skreyttir steinristum sem sýna meðal annars kameldýr og hesta.

Live Science skýrir frá þessu og hefur eftir Ulan Umitkaliyev, hjá Eurasian National háskólanum, að byggingin hafi verið um þrír metrar á hæð og hafi líklega verið einhverskonar grafhýsi.  Hann sagði að svipuð mannvirki hafi áður fundist í Kasakstan, aðallega í miðhluta landsins.

Innri veggir pýramídans eru byggðir eins og völundarhús sem liggur inn að gröf í hjarta pýramídans. Ekki liggur fyrir hvort líkamsleifar eru í gröfinni eða í pýramídanum.

Enn er unnið að uppgreftri á svæðinu. Meðal þess sem hefur fundist fram að þessu eru leifar af keramiki, gulleyrnalokkur og aðrir skartgripir auk hestabeina sem fundust við hlið pýramídans.