Á tíunda tímanum á laugardaginn voru viðbragðsaðilar sendir á afskekkt svæði í Sumner County í Kansas eftir að tilkynning barst um að maður hefði verið skotinn í bakið.

Lögreglan segir að maðurinn, Joseph Austin Smith, hafi verið skotinn í bakið þegar hann sat í farþegasætinu í pallbifreið.

Viðbragðsaðilar veittu honum alla hugsanlega aðstoð á vettvangi en án árangurs. Hann var úrskurðaður látinn á vettvangi.

Talsmaður lögreglunnar segir að Smith hafi verið á veiðum með vini sínum. Í aftursæti bifreiðarinnar var veiðibúnaður þeirra og riffill. Riffillinn var hlaðinn og þegar hundur veiðifélagans steig á hann hljóp skot úr honum og lenti í baki Smith.

Larry Hastings, starfsmaður veiðieftirlitsins í Kansas, sagði í samtali við kansas.com að hann hafi byrjað að starfa sem veiðieftirlitsmaður 1991 og þetta sé í annað sinn frá þeim tíma sem hann hafi heyrt af máli þar sem hundur skýtur mann.  Veiðimaðurinn lést þó ekki í því slysi.