Í september 2017 var Awad Al-Qarni, 65 ára lagaprófessor, handtekinn af sádi-arabísku lögreglunni. Handtakan var sögð marka upphafið að aðgerðum hins nýja krónprins, Mohammed bin Salman, gegn stjórnarandstæðingum og gagnrýnendum.

The Guardian segir að samkvæmt dómskjölum þá krefjist saksóknarar dauðadóms yfir prófessornum fyrir meinta glæpi hans, þar á meðal að hafa notað Twitter og WhatsApp til að deila fréttum sem teljast „óhliðhollar“ sádi-arabískum stjórnvöldum.

Sádi-arabískir fjölmiðlar, sem lúta stjórn yfirvalda, hafa dregið þá mynd upp af Al-Qarni að hann sé hættulegur predikari en stjórnarandstæðingar segja að hann sé mikilvægur og virtur fræðimaður sem hafi átt sér marga fylgjendur, þar á meðal tvær milljónir á Twitter.

Baráttufólk fyrir mannréttindum og sádi-arabískir útlagar hafa varað við aðgerðum stjórnvalda og segja þau vera að taka mjög harkalega á einstaklingum sem eru taldir vera gagnrýnir í garð stjórnvalda. Má þar nefna að á síðasta ári var Salma al-Shehab, doktorsnemi við háskólann í Leeds á Englandi og tveggja barna móðir, dæmd í 34 ára fangelsi fyrir að vera með Twitteraðgang og fyrir að fylgja og endurtísta tístum stjórnarandstæðinga og aðgerðasinnar.

Önnur kona, Noura al-Qahtani, var dæmdi í 45 ára fangelsi fyrir að nota Twitter.

Notkun samfélagsmiðla og annarra samskiptaleiða var gerð ólögleg í Sádi-Arabíu eftir að krónprinsinn komst til valda.

Sádi-arabísk stjórnvöld og þarlendir fjárfestar, sem lúta stjórn yfirvalda, hafa að undanförnu aukið hlut sinn í bandarískum samfélagsmiðlum, þar á meðal Twitter og Facebook, auk afþreyingarfyrirtækja á borð við Disney.