Videnskab.dk skýrir frá þessu. Fram kemur að í nýrri rannsókn hafi vísindamenn rannsakað erfðaefni tannarinnar og komist að því að hún er úr rostungi sem bjó við vestanvert Grænland.
Søren Sindbæk, prófessor og fornleifafræðingur við Árósaháskóla, sagði í samtali við Videnskab.dk að rannsóknin veiti mikilvægar og óvæntar upplýsingar um viðskipti á víkingatímanum og snemma á miðöldum. Hann kom ekki að rannsókninni en hefur lesið hana.
Hann sagði að lengi hafi verið vitað að viðskipti voru stunduð með rostungstennur en talið hafi verið að það einskorðaðist við norðanverða Evrópu. Nú liggi fyrir að tennur hafi einnig verið seldar í austanverðri álfunni og það breyti hugmyndum okkar um hversu nátengdir Evrópu norrænu íbúarnir á Grænlandi voru.
Hann sagði að þrátt fyrir að tönnin sé frá því um 100 árum eftir hinn svokallaða víkingatíma, sem var frá um 800 til 1050, þá hafi hún borist til Úkraínu eftir þeim verslunarleiðum sem norrænir menn hafi myndað á víkingatímanum.
Tönnin hefur farið eftir um 4.000 km langri verslunarleið frá vesturströnd Grænlands til Skandinavíu og áfram eftir ám til miðhluta Austur-Evrópu.
„Grænlensku veiðimennirnir seldu líklega vörur sínar í gegnum Ísland. Þaðan voru þær fluttar til Þrándheims í Noregi og áfram til Eystrasalts, í gegnum Kirjálabotn og til Novogrod sem var mikilvæg viðskiptamiðstöð á þeim tíma,“ sagði Sindbæk.
