Á sunnudaginn var maðurinn, sem er grunaður um að hafa myrt hana, handtekinn á heimili sínu. CNN skýrir frá þessu og segir að þetta komi fram í fréttatilkynningu frá saksóknaraembættinu í Lancaster County.
Á þeim rúmu 46 árum sem eru liðin síðan Lindy var myrt hafa Manor Township lögreglan og Pennsylvania State Police rannsakað morðið, fylgt fjölda vísbendinga eftir og hreinsað tugi manna undan grun. Fjöldi fólks var yfirheyrður og hin ýmsu sönnunargögn send til rannsóknar á hinum ýmsu rannsóknarstofum.
Það var með aðstoð erfðafræðirannsókna, sem byggðust á DNA sem fannst á morðvettvanginum, sem lögreglunni tókst að hafa hendur í hári hins meinta morðingja. Hann heitir David Vincent Sinopoli og er 68 ára.
Hann var handtekinn á sunnudaginn og úrskurðaður í gæsluvarðhald. Hann getur ekki fengið lausn gegn tryggingu.
Heather Adams, saksóknari í Lancaster County, sagði í fréttatilkynningu að handtakan marki upphafið að lokakaflanum í elsta óleysta morðmálinu í Lancaster County. Það sé von saksóknaraembættisins að þetta muni að einhverju leyti verða léttir fyrir aðstandendur Lindy og íbúa í Lancaster County.
Saksóknaraembættið sendi sönnunargögn, sem fundust á morðvettvangi, til rannsóknar árið 1997. Í þeim fannst DNA úr karlmanni í nærbuxum Lindy.
Þremur árum síðar voru upplýsingarnar um þetta DNA skráðar í gagnagrunn á landsvísu, CODIS, til að kanna hvort það gæfi svörun við þekktan brotamann. En engin svörun fannst í CODIS.
Í ársbyrjun 2019 var settur aukinn kraftur í rannsókn málsins þegar sú deild saksóknaraembættisins, sem sérhæfir sig í rannsókn gamalla sakamála, tók við rannsókninni.
Upplýsingar um erfðamengi morðingjans voru sendar til Parabon NanoLabs. Rannsóknir þar veittu ekki upplýsingar um ákveðinn einstakling og því varð að beita óhefðbundnum aðferðum við að þrengja hringinn. Þó lá fyrir að morðinginn væri líklega af ítölsku bergi brotinn. Vísindamenn rannsökuðu því landfræðilega þætti og unnu út frá upplýsingum um innflytjendur til Bandaríkjanna og fjölskyldunöfn þeirra. Út frá þessu komust þeir að því að morðinginn ætti rætur að rekja til Gasperina sem er bær í Calabria á Ítalíu.
Nokkrir einstaklingar bjuggu í Lancaster sem voru á réttum aldri, kyni og voru með ættartré sem passaði við þetta. Af þeim sökum var hægt að þrengja hringinn.
Sinopoli og Lindy bjuggu eitt sinn í sama fjölbýlishúsinu að sögn saksóknara sem sagði ekki hvenær það var. Hann fór ekki nánar út í hvernig þau hefðu hugsanlega tengst að öðru leyti. En þetta varð til þess að grunur lögreglunnar beindist að honum.
Lögreglan fylgdist vel með Sinopoli og það bar árangur þann 11. febrúar síðastliðinn. Þá var hann staddur á alþjóðaflugvellinum í Philadelphia. Hann fékk sér kaffibolla þar og henti honum síðan í ruslið. Það sáu lögreglumenn og tóku þeir bollann til handargagns og sendu til rannsóknar. Lífsýni á honum gáfu fullkomna svörun við lífsýnin sem fundust á Lindy fyrir rúmum 46 árum.
