Japanski milljarðamæringurinn Yusaku Maezawa leitar nú að átta manns til að fara með honum í ferð í kringum tunglið með geimflaug frá SpaceX. Hann keypti öll sætin í ferðinni sem verður farin 2023 í fyrsta lagi. Gengið var frá kaupunum 2018 og þá sagði Maezawa að hann hefði í hyggju að bjóða sex til átta listamönnum að koma með sér.

Á miðvikudaginn birti hann myndband á Twitter þar sem hann sagði: „Ég er að bjóða ykkur með mér í þessa ferð. Átta manns, alls staðar að úr heiminum. Ég keypti öll sætin svo þetta verður einkaferð.“

Maezawa, sem er 45 ára, sagði að upphafleg hugmynd hans um að bjóða listamönnum með í ferðina hafi „þróast“ því hann hafi komist að þeirri niðurstöðu að allir, sem eru að gera eitthvað skapandi, geti kallast listamenn.  

10 til 12 manns fara í ferðina en miðað er við að geimfarið fari hring um tunglið áður en það snýr til jarðar.