Þann 19. september síðastliðinn fannst Gabby Petito látin í þjóðgarði í Wyoming í Bandaríkjunum en hennar hafði þá verið saknað í nokkrar vikur. Hún hafði verið á ferðalagi um Bandaríkin ásamt unnusta sínum, Brian Laundrie, en hann sneri einn heim til Flórída í byrjun september og vildi ekkert segja um hvar Gabby væri.

Málið þótti strax dularfullt og leit hófst að Gabby. Nokkrum dögum áður en lík hennar fannst lét Brian sig hverfa og hefur ekki fundist síðan þrátt fyrir mikla leit lögreglunnar sem telur nú helmingslíkur á að hann sé á lífi.

Á fréttamannafundi í gær staðfesti Brent Blue, réttarmeinafræðingur, dánarorsök Gabby og sagði hana vera kyrkingu. CNN skýrir frá þessu. Hann sagði að hún hefði látist þremur til fjórum vikum áður en lík hennar fannst.