„Mér leið illa – mér fannst að ég hefði ekki átt að sjá þetta.“ „Stundum finnst mér þetta ógeðslegt, stundum er þetta í lagi.“ Þetta sögðu tveir þátttakendur í nýrri breskri rannsókn, sem beindist að reynslu 1.072 barna og ungmenna af klámi á netinu, þegar rætt var við þá.

Þátttakendurnir í rannsókninni voru á aldrinum 11 til 16 ára, allir frá Bretlandi. Elena Martellozzo, lektor í afbrotafræði við Middlesex háskólann í Lundúnum, vann að rannsókninni ásamt fjórum öðrum vísindamönnum. Hún segir að það sem hafi komið henni á óvart og valdi henni áhyggjum sé að 28% 11 og 12 ára barna hafi séð klám.

Hún bendir á að það verði alltaf til börn og ungmenni sem leita markvisst að klámi en rannsóknin sýni að sú staðreynd að börn noti internetið geri að verkum að þau séu í hættu á að sjá klám.

„Áður en internetið kom til sögunnar keypti fólk klámblöð en nú leitar það að klámi á netinu. Rannsókn okkar sýnir að börn, sem leita ekki markvisst að klámi, sjá það samt á netinu.“

Niðurstöður rannsóknarinnar sýna að 26% þátttakenda höfðu fengið klámefni sent eða séð slíkt efni án þess að vilja það.

„Þau eru ekki undir þetta búin og klámið, sem er á netinu, getur þeim fundist vera ofbeldisfullt og það það vekur áhyggjur hjá þeim.“