Vitað að samskipti ríkjanna hafa heldur batnað á síðustu misserum, eftir áratugalanga óvináttu, því þau eiga sér sameiginlegan óvin sem er Íran en svo háttsettir embættismenn hafa ekki áður fundað.
Yossi Cohen, yfirmaður leyniþjónustunnar Mossad, er sagður hafa verið í för með Netanyahu. Yfirvöld í löndunum hafa ekki svarað fyrirspurnum um málið. Fluggögn sýna að einkaþota, sem Netanyahu hefur áður flogið með, fór frá Tel Aviv til Neom í Sádi-Arabíu þar sem krónprinsinn og Pompeo funduðu á sunnudagskvöldið. Flugvélin stoppaði í nokkrar klukkustundir í borginni áður en henni var flogið aftur til Tel Aviv.
Topaz Luk, einn af þeim starfsmönnum Netanyahu sem sér um samfélagsmiðla hans, gaf í skyn að fundurinn hefði átt sér stað þegar hann tísti að Netanyahu væri að „semja frið“ á meðan fyrrum keppinautur hans, Benny Gantz, væri að „sinna stjórnmálum“. Þau ummæli tengjast því að Gantz skipaði á sunnudaginn rannsóknarnefnd sem á að rannsaka umdeild kaup Ísraels á þýskum kafbátum. Margir samstarfsmenn Netanyahu, þar á meðal frændi hans, eru sagðir hafa hagnast á kaupunum. Netanyahu er ekki grunaður um aðild að málinu.
Ráðherra í ríkisstjórn Netanyahu staðfesti síðan í gær að forsætisráðherrann hefði farið í heimsókn til Sádi-Arabíu. Embætti forsætisráðherrans hefur ekki enn tjáð sig um þetta.
