Það var óvenjuleg sjón sem mætti íbúum í háhýsi í miðborg Árósa um síðustu helgi. Þá hjálpuðu þau Katrine Harpøth og Ole Lange Andersen andamömmu, sem hafði verpt á svölum á sjöttu hæð, niður á fyrstu hæð með alla ungana 14. Það var kominn tími til að fara með ungana í vatn og því þurfti að aðstoða fjölskylduna.

Andamamman verpti á svölunum hjá Katrine og Ole og þau tóku því að sér að aðstoða fjölskylduna við að flytja búferlum. Það tókst vel en til að fá endurnar til að fylgja sér létu þau brauðmola detta niður fyrir framan endurnar sem síðan eltu brauðmolaslóðina sem endaði inni í lyftu hússins. DK Newsner skýrir frá þessu.

Þegar inn í lyftuna var komið var hún látin fara niður og endurnar aðstoðaðar við að komast út úr henni og að nærliggjandi á. Allt tók þetta aðeins átta mínútur. Katrine og Ole eru að verða vön að standa í aðstoð sem þessari því önnur önd verpti á svölunum þeirra á síðasta ári og aðstoðuðu þau hana einnig við að komast niður að á með alla 11 ungana.