Fyrir þremur árum var 147 tígrisdýrum bjargað úr frægu búddahofi í Taílandi. Þar hafði þeim verið haldið árum saman til að laða ferðamenn að. Nú er svo komið að 86 af dýrunum eru dauð en þau hafa verið í umsjá taílenskra yfirvalda síðan þeim var bjargað. Sjúkdómur varð dýrunum að bana.

Yfirvöld skýrðu frá þessu á mánudaginn. Dýrin voru flutt í ríkisrekið friðland og hafa dvalið þar síðan þeim var bjargað. Þau eru viðkvæm fyrir sjúkdómum vegna innræktar segja yfirvöld. Erfðarannsóknir á dýrunum 147 sýndu að þau eru öll komin af sömu sex tígrisdýrunum.

Í rúman áratug var Wat Pha Luang Ta Bua hofið nánast eins og dýragarður en þangað streymdi fólk til að láta taka myndir af sér með tígrisdýrum. Það var ekki fyrr en eftir margra ára þrýsting frá útlöndum sem taílensk yfirvöld gerðu eitthvað í málinu og björguðu tígrisdýrunum úr prísundinni. Auk hinna lifandi dýra fundust tígrisdýraskinn, bein og 60 tígrisdýraungar sem höfðu verið frystir.

Talið er að um 1.000 tígrisdýr séu í Taílandi en aðeins 200 þeirra lifa frjáls úti í náttúrunni. Á heimsvísu eru aðeins um 4.000 tígrisdýr sem lifa frjáls úti í náttúrunni.