Ung indversk kona berst nú fyrir lífi sínu eftir að kveikt var í henni þegar hún var á leið í dómssal til að bera vitni í nauðgunarmáli. Þar átti hún að bera vitni í máli gegn tveimur körlum sem eru ákærðir fyrir að hafa nauðgað henni.

BBC segir að þegar konan var á leið á lestarstöð hafi verið ráðist á hana, hún dregin út á akur og kveikt í henni. Lögreglan í Uttar Pradesh, einu ríkja Indlands, hefur handtekið fimm karla vegna árásarinnar. Tveir þeirra eru þeir sem eru ákærðir fyrir að hafa nauðgað konunni.

Málið hefur kynnt enn frekar undir mótmæli og óróa á Indlandi vegna ofbeldisverka gegn konum en um langa hríð hafa gróf nauðgunarmál, árásir og morð á konum verið í fréttum þar í landi og víða um heim.

BBC segir að indverska lögreglan hafi rannsakað 33.658 nauðgunarmál 2017. Ekki er vitað hversu margar nauðganirnar eru í heild á ári nema hvað að þær séu miklu fleiri en þessi tala segir til um.