Óhugnanlegt mál er nú til meðferðar fyrir dómstólum sem varðar eltihrelli sem braut kynferðislega á fórnarlambi sínu.

Það var þann 1. september síðastliðinn að Ena Matsuoka, 21 árs liðskona J-pop hljómsveitarinnar Tenshitsukinukeniyomi, varð fyrir fólskulegri árás á heimili sínu.

Árásarmaðurinn var 26 ára karlmaður, Hibiki Sato, en hann beitti býsna útsmoginni aðferð til að komast að því var poppstjarnan átti heima.

Ena hafði birt sjálfsmynd á samfélagsmiðlum og ef súmmað var nógu mikið inn á myndina, nánar tiltekið á augu poppstjörnunnar, mátti greina lestarstöð eða strætóstoppistöð beint fyrir utan heimili hennar.

Sato þessi notaði Google Street View til að bera myndina saman við myndir úr kerfi Google og þannig gat hann fundið út nákvæmlega hvar hún átti heima. Þann 1. september síðastliðinn fór hann að heimili hennar, beið eftir að hún kom heim áður en hann réðst til atlögu og nauðgaði henni.

Lögreglu tókst að hafa hendur í hári Sato á þriðjudag eftir að hafa lagst yfir upptökur úr öryggismyndavélum. Við yfirheyrslur játaði hann að hafa rannsakað endurkast og speglanir á ljósmyndum sem Ena hafði birt á samfélagsmiðlum.