Miklir kuldar herja nú á stóran hluta Bandaríkjanna. National Weather Service segir að tveir þriðju hlutar austurhluta landsins muni fá að kenna á miklum vindi og nístingskulda. BBC hefur eftir John Gagan, veðurfræðingi, að aðstæður sem þessar upplifi fólk aðeins einu sinni á ævinni, svo sjaldgæft er þetta. Mesta kuldanum er spáð á morgun, fimmtudag, en þá telja veðurfræðingar að frostið muni fara niður í 33 gráður í Chicago og vera eins og 46 gráður þegar vindkæling hefur verið tekin með í reikninginn. Þá verður kaldara þar en á Norðurpólnum.

Í nokkrum ríkjum hefur neyðarástandi verið lýst yfir vegna kuldanna, þar á meðal í Wisconsin, Michigan og Illinois, þar sem Chicago er. Fólk á á hættu að verða fyrir ofkælingu og kali á nokkrum mínútum enda er frostið víða mikið og þegar vindkælingin hefur verið tekin með í reikninginn getur það jafnast á við 50 stiga frost. Ef vindkælingin gerir kuldann meiri en 45 gráður getur óvarin húð frosið á fimm mínútum. CNN segir að bandaríska póstþjónustan hafi ákveðið að hætta öllum póstburði í sex ríkjum og í fjórum öðrum verður póstþjónusta mjög skert á meðan á þessu mikla kuldakasti stendur.

En það er ekki nóg með að það sé nístingskuldi sem herjar á fólk heldur bætist snjór við hremmingarnar. Í Wisconsin er til dæmis spáð mikilli snjókomu og að þar falli allt að 60 sm af snjó.