Það er Aftonbladet sem skýrir frá þessu í dag. Blaðið hefur að undanförnu fjallað um hvernig þingmenn hafa misfarið með almannafé og látið þingið greiða útgjöld sem þeir eiga sjálfir að greiða. Að minnsta kosti tveir þingmenn hafa hætt afskiptum af stjórnmálum í kjölfar umfjöllunar blaðsins.
Engblom sagði í upphafi að hún myndi ekkert eftir þessu en viðurkenndi síðan að hafa notað vildarpunkta til að greiða fyrir flug fjölskyldunnar til Flórída eða nánar tiltekið til að fá betri sæti en hún greiddi fyrir. Hún segir að hér hafi verið um mistök að ræða og að hún muni gera skrifstofu þingsins viðvart sem og skattayfirvöldum. Síðan birti hún færslu á Facebook þar sem hún skýrði frá málinu og sagðist gera þessa leiðréttingu að eigin frumkvæði og minntist ekki á skoðun Aftonbladet á málinu eða samskiptunum við blaðamenn vegna þess.
Aftonbladet hefur farið ofan í kjölinn á flugferðum þeirra 50 flugmanna sem hafa flogið mest frá 2014. Flugmiðar þeirra hafa kostað tæplega 30 milljónir sænskra króna. Flestar ferðirnar hafa verið farnar með SAS og hafa þingmennirnir fengið mörg hundruð þúsund vildarpunkta eða bónuspunkta eins og SAS kallar þetta.
Þingið er með skýrar reglur um notkun punktanna en fylgist ekki með því að þeim sé fylgt.
