Eins og DV skýrði frá í gær þá leitaði lögreglan í Texas í Bandaríkjunum að dularfullri konu sem hafði hringt dyrabjöllum á húsum í Sunrise Ranch hverfinu í Montgomery nýlega. Konan var horfin þegar fólk kom til dyra en myndir náðust af henni á eftirlitsmyndavél við eitt húsanna. Nú hefur lögreglan fundið konuna og leyst þetta dularfulla mál.

Konan er 32 ára og fannst hún á lífi hjá ættingjum sínum í öðru ríki og er ekki í hættu að sögn lögreglunnar. Hún bjó í hverfinu með 49 ára unnusta sínum. Hún var á flótta undan honum þegar hún hringdi dyrabjöllunum en hann hafði beitt hana ofbeldi.

Unnustinn fannst látinn að sögn lögreglunnar en hann hafði tekið eigið líf og skilið eftir kveðjubréf.