Dagblaðið Expressen fjallar í dag ítarlega um nokkra frambjóðendur Svíþjóðardemókratanna en þessir frambjóðendur eiga sér allir fortíð innan hreyfingar nýnasista.
Bandaríkjamaðurinn Richard Spencer er leiðtogi hreyfingarinnar en hann er þekktur talsmaður þess að hvíti kynþátturinn beri af öðrum. Sjálfur segist hann vera hvítur þjóðernissinni. Hann komst í fréttirnar hér á landi í byrjun júlí eftir að för hans frá Bandaríkjunum til Póllands var stöðvuð á Keflavíkurflugvelli og honum gert að fara aftur til Bandaríkjanna. Pólsk yfirvöld höfðu að sögn engan áhuga á að fá hann til landsins. Spencer er tengdur nýnasistum og markmið hans er að koma öfgastefnu sinni og andlýðræðislegum viðhorfum að sem víðast til að breyta heiminum og heimsmyndinni.
Til að hrinda þessu í framkvæmd er hann með marga samverkamenn. Einn þeirra er Svíinn Daniel Friberg sem Spencer segir vera „ómissandi“ fyrir Alt-Right hreyfinguna. Þetta kemur fram í fréttaskýringaþættinum Uppdrag granskning sem verður sýndur í Sænska ríkissjónvarpinu í kvöld. Fjallað er um þáttinn og efni hans á vef Sænska ríkisútvarpsins. Þar kemur fram að meðal annars sé rætt við Spencer sem segi að Friberg og fleiri Svíar séu í framlínu hreyfingarinnar og það sé athyglisvert að leiðtogar hennar komi hvorki frá Þýskalandi né Ítalíu sem hafa verið talin sterk vígi hægriöfgamanna á borð við nýnasista.
Friberg var meðlimur í Sænsku andspyrnuhreyfingunni sem varð síðar að Norrænu andspyrnuhreyfingunni, NMR. Ásamt Spencer og tveimur öðrum stofnaði hann Alt-Right Corporation sem tengir Alt-Right hreyfingar um allan heim saman. Friberg er búsettur í Ungverjalandi og Póllandi og rekur bókaútgáfu sem er sögð vera stærsta bókaútgáfa hægriöfgamanna í heiminum.
„Við sjáum þessa þróun í allri Evrópu. Þetta snýst aðallega um tíma, hversu langan tíma þarf þar til flokkar, sem láta sér annt um framtíð Evrópu, verða stærstu flokkarnir.“
Segir Friberg í samtali við Uppdrag granskning.
