Lögmanninum Kristjáni Gunnari Valdimarssyni var ekki gert að sæta áframhaldandi gæsluvarðhaldi samkvæmt úrskurði héraðsdóms í árslok. Kristján Gunnar er grunaður um kynferðisbrot og frelsissviptingu, þar af tvö brot sem áttu sér stað eftir að hann var upphaflega handtekinn af lögreglu. Dómari sem tók fyrir síðari gæsluvarðhaldskröfuna tók sér sólarhring til að fella úrskurð í málinu. Þetta þykir einsdæmi í slíkum málum sem dómarar eru almennt fljótir að úrskurða í. Samkvæmt nýlegum dómum Landsréttar þar sem krafa um gæsluvarðhald hefur verið tekin fyrir hefur slíkt verið samþykkt á grundvelli almannahagsmuna, gruns um að einstaklingar haldi áfram brotum sínum, eða spilli fyrir rannsókn á frumstigi. Hvernig eiga þessi rök ekki við í tilviki Kristjáns Gunnars? Skiptir þar máli að hann er með skammstöfunina hdl. en ekki einstaklingarnir í hinum málunum?
