Faðir manns sem varð fyrir fólskulegri líkamsárás og frelsissviptingu í Vatnagörðum í Reykjavík fyrir skemmstu segir það galið að árásarmennirnir tveir gangi lausir.

Faðirinn ræðir málið í viðtali sem birtist á vef Vísis í morgun en þar birtist einnig mynd af áverkum sem fórnarlamb árásarinnar hlaut.

Mennirnir voru handteknir í lok janúar eftir árásina og úrskurðaðir í gæsluvarðhald í héraðsdómi í tvær vikur. Gæsluvarðhald var svo framlengt í fjórar vikur en Landsréttur felldi þann úrskurð úr gildi og hafa árásarmennirnir gengið lausir síðan.

Meðal gagna málsins eru upptökur af árásinni en greint hefur verið frá því að fórnarlambið hafi verið bundinn við stól, stunginn með stálröri, hnífi og broti úr spegli. Þá hafi ristar hans verið brotnar.

Manninum tókst að flýja árásarmennina og gera vart við sig með því að brjóta rúðu í nærliggjandi húsa. Við það virðist maðurinn hafa skorist illa með þeim afleiðingum að mikið blæddi úr slagæð á handleggnum. Var mönnunum sleppt úr gæsluvarðhaldi einmitt vegna þess að ekki lá fyrir hvort alvarlegasti áverkinn væri af völdum árásarmannanna eða vegna rúðunnar sem brotnaði.

Faðir mannsins er ómyrkur í máli í samtali við Vísi og segir að mennirnir hafi reynt að drepa son hans. Ekki hafi verið um neina innheimtu að ræða heldur hreinræktað rán.

„Sonur minn er fenginn til að koma í Vatnagarða þar sem einn árásarmannanna bjó. Þá er hann tekinn, negldur niður í stól og það var búið að undirbúa þetta. Þetta er bara rán, hann skuldaði þessum mönnum ekki neitt. Þeir voru næstum búnir að drepa hann,“ segir hann í viðtalinu við Vísi en sonur mannsins og annar árásarmannanna eru æskuvinir og voru saman í grunnskóla í Garðabæ.

Nánar er rætt við föðurinn á vef Vísis og einnig við Grím Grímsson yfirlögregluþjón um gang rannsóknarinnar.