Hinn nítján ára Alexander Máni varð fyrir fólskulegri árás við Árbæjarkirkju í gærkvöldi þegar hann var í göngutúr með hundinum sínum.

Alexander segir í samtali við blaðamann að hópur drengja hafi ráðist að honum upp úr þurru, spreyjað í augun á honum með spreybrúsa.

„Ég var bara að labba með hundinn minn, hlusta á tónlist, njóta mín. Ég sá fjóra stráka í fjarska. Ég sá ekkert í andlitin á þeim.“

„Allt í einu heyri ég öskur fyrir aftan mig, sný mér við og fæ piparsprey í andlitið,“
Alexander segir að þeir hafi allir verið grímuklæddir og því hafi hann ekki séð framan í þá. Hann segir einnig að sársaukinn vegna piparúðans hafi verið mikill.

„Þetta var hræðilegt, þetta brann mikið og lengi bæði í augunum og hálsinum. Þetta fór í munninn á mér og ég náði ekki andanum.“

„Fyrir aftan Árbæjarkirkju er brunnur sem ég komst í, en ég gat ekki kyngt vatninu og þurfti að spíta því út. Þegar ég skolaði augun leið mér eins og þau væru full af sandi.“

„Þetta var hörmulegt, mér leið eins og væri að deyja. Ég gat ekki andað.“

Drengirnir sem réðust á Alexander veittust þó ekki frekar að honum.

„Ég var hræddur um að þeir ætluðu að ræna mig, en þeir hlupu í burtu þegar maður kom þar að á hjóli.“
Alexander er mjög þakklátur stúlku sem að hjálpaði honum eftir árásina. „Ég er mjög glaður að hún hafi verið þarna, tók símann minn og hringdi á neyðarlínuna,“

„Ég veit ekki hvort þeir hafi verið undir áhrifum áfengis eða fíkniefna, en þeir virtust ekki vera með neitt í kollinum, voru bara í ruglinu,“ segir Alexander um drengina sem eiga allir að hafa verið svartklæddir.

„Ég var bara að labba framhjá og þeir hafa hugsað, afhverju ekki bara að spreyja á þennan?“