Faðir í Arizona í Bandaríkjunum hefur verið handtekinn og ákærður fyrir morð á tveggja ára dóttur sinni.

Hinn 37 ára gamli Christopher Scholtes lagði fyrir framan heimili sitt í bænum Marana í vikunni en þá var tveggja ára dóttir hans sofnuð í aftursætinu. Þrátt fyrir að gríðarleg hitabylgja væri í fullum gangi, yfir 42 stiga hiti þennan dag, ákvað Scholtes að leyfa dóttur sinni að sofa áfram úti í bílnum og taldi að loftkæling bílsins myndi tryggja að allt yrði í lagi.

Svo virðist hins vegar sem að Scholtes hafi gleymt dóttur sinni í bílnum og að endingu drap bíllinn á sér með hræðilegum afleiðingum.

Þegar móðir stúlkunnar, sem starfar sem hjúkrunarfræðingur á nærliggjandi sjúkrahúsi, kom heim úr vinnunni kom hún að stúlkunni meðvitundarlausri í bílnum. Endurlífgunartilraunir hennar báru ekki árangur.

Með því að skoða öryggismyndavélar nágranna komast lögreglan að því Scholtes hafði gleymt dóttur sinni í bílnum í þrjár klukkustundir en ekki liggur enn fyrir hvenær slokknaði á loftkælingunni.

Lögregluyfirvöld ytra sögðu harmleikinn enn eitt dæmi um hversu stórhættulegt það er að skilja börn og ferfætlinga eftir í bílum í miklum hita. Lífshættulegar aðstæður geti skapast á aðeins nokkrum mínútum.