Vonskuveður gengur nú yfir víða á landinu en færð og skyggni á suðvesturhluta landsins eru erfið og mörgum vegum hefur verið lokað, þar á meðal Reykjanesbraut. Miðað við tilkynningu frá lögreglunni á Suðurnesjum er ástandið á Reykjanesbraut afar erftitt en fólk sem er fast þar í bílum sínum er beðið að bíða þar sem viðbragðsaðilar komist ekki að þeim.
Segir í tilkynningunni að ökumenn sem eru fastir í bílum sínum á Reykjanesbraut sem og á öðrum vegum séu beðnir halda kyrru fyrir. Það sé 5 bíla árekstur á brautinni, slysalaus, en viðbragðsaðilar komist ekki á vettvang sökum færðar. Ökutæki þveri brautina og snjóruðningstæki eigi mjög erfitt um vik þarna. Veður sé verulega slæmt, ekkert skyggni og mikið rok. Björgunarsveitir séu að gera sitt besta til að komast til fólks en það gangi hægt.
