Fréttamiðillinn Axios greinir frá því að Trump hafi á dögunum hafnað hugmynd Netanjahú um að almenningur Íran yrði hvattur til að fara út á götur og mótmæla stjórnvöldum af hörku.
Í símtali milli leiðtoganna á Trump að hafa sagt: „Hvers vegna í fjáranum ættum við að segja fólki að fara út á göturnar þegar það verður einfaldlega skotið?“
Ágreiningurinn kom upp skömmu eftir að háttsettur íranskur öryggisleiðtogi féll í loftárás Ísraels. Netanjahú mun hafa talið að íranska stjórnkerfið væri nær lamað og kærkomið tækifæri væri fyrir uppreisn almennra borgara.
Trump er hins vegar sagður hafa óttast að slík hvatning gæti leitt til fjöldamorða, minnugur atburðanna sem áttu sér stað í janúar þar sem þúsundir létust.
Bandaríkin sendu Írönum í gær 15 liða friðaráætlun og herma heimildir að yfirvöldum í Ísrael hafi þótt áætlunin ekki ganga nógu langt til að veikja hernaðargetu Írans. Trump hefur á hinn bóginn lagt áherslu á skjóta lausn á átökunum.
Í ræðu til flokksfélaga sinna sagði hann að Bandaríkin og Ísrael hefðu þegar „skorið burt krabbameinið“ í kjarnorkuáætlun Írans. „Við höfum skorið það burt. Nú ætlum við að klára verkið,“ sagði forsetinn og bætti við að markmiðið væri að stríðið yrði skammvinnt.
