Starfsfólk Landspítalans mun ekki fá páskaegg í ár eins og tíðkast hefur. Ákveðið var að grípa til þessarar ráðstöfunar til að hægt verði með betra móti að mæta þriggja til fjögurra milljarða króna niðurskurðarkröfu á spítalann.

Morgunblaðið greinir frá þessu í dag.

Landspítalinn er stærsti vinnustaður landsins með yfir sex þúsund starfsmenn, en í frétt blaðsins er áætlað að virði sex þúsund páskaeggja í smásölu í stærð 4 sé um 14,5 milljónir króna.

Runólfur Pálsson, forstjóri Landspítalans, lýsti í febrúar síðastliðnum miklum vonbrigðum með fjárveitingar ríkisstjórnarinnar til spítalans fyrir árið 2026.

„Verður að segjast að niðurstaðan felur í sér meiri vonbrigði en áður í minni forstjóratíð,“ sagði hann í Spítalapúlsinum, fréttabréfi Landspítalans, sem Morgunblaðið fjallaði um fyrir skemmstu.