Frá og með föstudeginum 9. janúar 2026 mun meðstofnandi Klappa, Þorsteinn Svanur Jónsson, sem nú gegnir stöðu framkvæmdastjóra viðskiptaþróunar (Chief Business Development Officer), taka við daglegum rekstri félagsins sem forstjóri (Chief Executive Officer). Íris Karlsdóttir, yfirmaður samstarfssviðs, tekur við starfi hans sem framkvæmdastjóri viðskiptaþróunar. Jón Ágúst Þorsteinsson, fráfarandi forstjóri Klappa, mun leggja áherslu á að efla stefnu félagsins um vöxt og þróun félagsins til framtíðar.
„Þegar við stofnuðum Klappir árið 2014 hefði ég vart getað ímyndað mér hversu langt félagið myndi ná, eða hversu hratt það myndi gerast. Það sem hófst sem metnaðarfull hugmynd hefur þróast í öflugt og skalanlegt félag með sterkt vistkerfi, skýran tilgang og vaxandi alþjóðlega viðveru. Í dag gegnir Klappir mikilvægu hlutverki í að styðja fyrirtæki við að skilja og stýra auðlindanotkun sinni og bæta sjálfbærniframmistöðu sína með því að skapa meira virði með minni kostnaði. Ég er afar stoltur af því sem við höfum byggt upp saman,“ segir Jón Ágúst í tilkynningu.
,,Ég er sannfærður um að þessi endurskipulagning muni nýtast Klappir, viðskiptavinum þess og samstarfsaðilum vel á komandi árum. Við höfum starfað afar náið saman frá stofnun félagsins árið 2014 og hlökkum til að halda þeirri samvinnu áfram í nýjum hlutverkum. Mér þykir vænt um Klappir, fólkið hjá félaginu, vörurnar, vistkerfið í kringum það og ekki síst þau tækifæri sem Klappir hefur til að styðja fyrirtæki um allan heim við að bæta sjálfbærniframmistöðu sína og skapa langtímavirði fyrir samfélagið. Ég er þakklátur fyrir að hafa leitt Klappir í gegnum mótunarár félagsins og hlakka til að styðja við næsta kafla í vegferð þess,“ segir Jón Ágúst.
„Framundan eru mikil tækifæri og ég er þakklátur fyrir það traust sem mér er sýnt til að leiða Klappir inn í næsta vaxtarskeið. Frá stofnun Klappa hef ég fengið að starfa að fjölbreyttum verkefnum í takt við þróun fyrirtækisins, í nánu samstarfi við öflugt teymi og viðskiptavini. Samstarfið við viðskiptavini Klappa hefur verið sérstaklega gefandi og lærdómsríkt og haft mótandi áhrif á sýn félagsins og tilgang. Klappir stendur sterkt sem félag og hefur í gegnum árin þróað lausn sem hefur sérstöðu á markaði og á fáa jafningja. Á þeim grunni munum við halda áfram að byggja upp vistkerfi Klappa og auka verðmætasköpun fyrir viðskiptavini og samfélagið í heild,“ segir Þorsteinn Svanur Jónsson, framkvæmdastjóri viðskiptaþróunar.
Þorsteinn Svanur er einn stofnenda Klappa og hefur gegnt fjölbreyttum hlutverkum í takt við þróun og vöxt fyrirtækisins frá stofnun þess. Hann er með meistaragráðu í lögfræði frá Háskóla Íslands og gegnir í dag starfi framkvæmdastjóra viðskiptaþróunar. Í störfum sínum hefur Þorsteinn komið að fjölmörgum verkefnum innan fyrirtækisins og starfað náið með teymum Klappa að mótun lausna, þjónustu og þróun. Hann leiddi uppbyggingu vörunnar á fyrstu árum félagsins og hefur sinnt samstarfi og þjónustu gagnvart stórum hluta viðskiptavina Klappa í samvinnu við starfsfólk félagsins.
