Gular veðurviðvaranir eru í gildi um mestallt land í dag og eru það einungis höfuðborgarsvæðið og Breiðafjörður sem sleppa að þessu sinni. Varasamt ferðaveður verður víða um land og er viðbúið að vegir geti lokast með skömmum fyrirvara.

Fyrstu viðvaranirnar taka gildi upp úr hádegi á Suðurlandi, Suðausturlandi og Miðhálendinu.

Gera má ráð fyrir 15 til 25 metrum á sekúndu og gætu hviður farið yfir 35 metra á sekúndu. Hvassast verður undir Eyjafjöllum, í Öræfum og Mýrdal. Þá má búast við snjókomu eða slyddu og skafrenningi með slæmu skyggni á þessum slóðum. Ekkert ferðaveður verður.

Á Suðurlandi rennur gula viðvörunin úr gildi klukkan 17 en á Suðausturlandi klukkan 22 í kvöld.

Um miðjan dag tekur gul viðvörun gildi á Faxaflóa og má búast við 13 til 20 metrum á sekúndu með snjókomu, skafrenningi og slæmu skyggni.

Um kvöldmatarleytið taka svo gular viðvaranir gildi á Norðurlandi vestra, Norðurlandi eystra, Austurlandi og Austfjörðum og má búast við snjókomu og skafrenningi þar með slæmu skyggni. Miklar líkur eru á samgöngutruflunum fyrir austan.

Síðasta viðvörunin tekur svo gildi á Vestfjörðum klukkan 19 í kvöld og þar, líkt og annars staðar, má gera ráð fyrir snjókomu, skafrenningi og slæmu skyggni.

Á vef Vegagerðarinnar er tekið fram að fjölmargir vegir verði á óvissustigi í dag og gætu þeir lokast með skömmum fyrirvara. Þetta á til dæmis við um Reykjanesbraut, Hellisheiði og Þrengsli milli klukkan 11 og 17. Vegurinn um Kjalarnes verður á óvissustigi frá klukkan 11 til 23:59 í kvöld.

Sömu sögu er að segja um vegina um Holtavörðuheiði, Hafnarfjall, Fróðárheiði, Bröttubrekku, Öxnadalsheiði og fleiri. Eru ferðalangar hvattir til að kynna sér færð á vegum á vef Vegagerðarinnar.