(Tilkynning frá Lögreglunni á höfuðborgarsvæðinu)

Undanfarið hafa netöryggissveitinni CERT-IS og lögreglunni borist fjöldi tilkynninga vegna grunsamlegra tölvupósta sem sendir hafa verið á íslenska notendur.

Tölvupóstarnir eiga það allir sameiginlegt að vara fólk við að það muni verða fyrir tjóni ef það grípur ekki strax til aðgerða. Svikapóstarnir eru sendir í nafni þekktra þjónustufyrirtækja svo sem iCloud, Google og nafni íslenskra fjarskiptafyrirtækja. Dæmi um fyrirsagnir þeirra eru „Nettengingin þín er óvarin“, „Geymslan er full, Eyðing hafin“ og „Tafarlausra aðgerða krafist – gagnageymslan er full“.

Fólk sem hefur smellt á hlekkina þarf hins vegar ekki að óttast því ólíkt öðrum herferðum þar sem reynt er að komast yfir lykilorð eða greiðslukortaupplýsingar er þessi herferð að beina fólki á lögmæt þjónustufyrirtæki. Markmiðið er að fá fólk til að kaupa vörur af þessum fyrirtækjum sem borga svikurunum þóknun fyrir. Þessi herferð er ansi umfangsmikil og því getur það reynst rekstraraðilum ansi erfitt að koma í veg fyrir að svikapóstarnir berist til sinna notenda.

Það er því mikilvægt að vera á varðbergi fyrir svikapóstum sem þessum.