Laufey Lín Jónsdóttir hélt tvenna vel heppnaða tónleika í Kórnum um liðna helgi og er óhætt að segja að Íslendingar séu búir að eignast nýja stórstjörnu í tónlistarheiminum.

Í Morgunblaðinu í dag er rætt við Sigtrygg Baldursson, trommara og sérfræðing hjá Tónlistarmiðstöð, þar sem hann er spurður út í magnaðan árangur Laufeyjar á síðustu misserum.

Laufey hefur haldið hverja stórtónleikana á fætur öðrum og fyllt nokkrar af stærstu tónleikahöllum Bandaríkjanna og Bretlands. Þá eru framundan tónleikar í Asíu og Ástralíu.

Þegar Sigtryggur er spurður hvað skýri þessa velgengni Laufeyjar segir hann að hún höfði til mjög breiðs hóps.

„Það eru engin aldursmörk á því. Svo er það þessi tegund tónlistar sem hún er að skapa sem byggist á gömlum grunni en er samt ný í eðli sínu,“ segir hann meðal annars.

Sigtryggur segir að Laufey sé einstakur tónlistarmaður. Á tónleikunum í Kórnum hafi hún hlaupið um sviðið með dönsurunum og sungið óaðfinnanlega á sama tíma. „Hún fipaðist aldrei, fyrir utan að hún spilar á gítar, píanó og selló og gerir það allt mjög vel. Það var tilkomumikið að fylgjast með henni.“

Sigtryggur segir við Morgunblaðið að Laufeyju séu allir vegir færir og hún geti farið eins langt og hana langar.

„Hún á sér marga trygga aðdáendur sem eru ekki að fara að snúa við henni baki. Margir þeirra eru ungir hlustendur sem munu alast upp með tónlist hennar. Ef Laufey nennir að halda þessu áfram, þá eru henni allir vegir færir.“

Ítarlega er rætt við Sigtrygg í Morgunblaðinu í dag.