Jónas Guðbjörn Jónsson, formaður Þjóðhátíðarnefndar, segir hátíðina í ár verða þá sem hann muni lengst allra vegna samtakamáttar samfélagsins í Vestmannaeyjum, huga og hjarta íbúa. 

Segist hann aldrei hafa orðið vitni að neinu sem jafnast á við grettistak sem íbúar unnu um helgina þegar veðrið lék íbúa og þjóðhátíðargesti sem verst. Þakkar hann íbúum fyrir að opna heimili sín, þvottavélar og hjörtu fyrir gestum og að hafa myndað skjaldborg um velferð gesta Þjóðhátíðar í ár.

Yfirlýsing Jónasar er hér í heild sinni:

„Kæru Eyjamenn og þjóðhátíðargestir,

Þjóðhátíðin í Eyjum 2025 verður líklega sú Þjóðhátíð sem síðast rennur mér úr minni. Þetta árið eru það ekki brennan, brekkusöngurinn eða blysin sem standa upp úr heldur samtakamáttur þessa samfélags sem við eigum hér í Vestmannaeyjum. Þá er ég ekki að tala um húsin, heldur huga okkar og hjörtu.

Þvílíkt grettistak sem unnið var hér á föstudagskvöldi, aðfaranótt laugardags og fram undir kvöld á laugardag. Ég hef aldrei orðið vitni að öðru eins.

Verkefnin fyrir sjálfboðaliðana okkar og viðbragðsaðila voru ærin yfir nóttina, og þegar þrek- og þoltankar þeirra sem unnu um nóttina voru orðnir tómir, bættist við liðsauki alls staðar að úr bænum. Fólk lagðist á eitt með okkur og kláraði það sem þurfti að gera til að gera Herjólfsdal og allt svæðið tilbúið fyrir restina af hátíðinni.

Fjölskyldur opnuðu heimili sín og buðu gestum skjól sem lentu í vandræðum. Eyjamæður og ömmur buðu fram þurrkgrindur og þvottavélar til að þurrka blautan búnað og fatnað. Þvert á samfélagið okkar var mynduð skjaldborg um velferð gesta okkar.

Lögregla og viðbragðsaðilar lýstu hátíðinni einni af þeim rólegri þegar kom að áfengisneyslu og ofbeldi, sem staðfestir að forvarnastarf okkar ber árangur.

Ég er djúpt snortinn og yfir mig stoltur þegar ég skrifa þetta. Ég gæti haldið áfram að skrifa þakkir fram á næstu Þjóðhátíð, en ég treysti því að þakklæti mitt og allra þeirra sem með mér starfa í Þjóðhátíðarnefnd berist til ykkar allra sem lögðust í þetta með okkur.

Þjóðhátíðarnefnd vill færa öllum þeim sem komu að undirbúningi og framkvæmd hátíðarinnar innilegar þakkir sjálfboðaliðum, björgunarsveitum, tæknifólki, tónlistarmönnum, viðbragðsaðilum og ekki síst heimafólki sem stóð vaktina í orði og á borði.

Eftir storm helgarinnar stendur eftir sterkari vitund um það hvað Þjóðhátíðin í Eyjum er í raun og veru hún er ekki bara hátíð; hún er hjarta samfélagsins.

Innilegar þakkir.

Fh. Þjóðhátíðarnefndar ÍBV

Jónas Guðbjörn Jónsson.“

Þjóðhátíðarnefndina í ár skipa:

Jónas Guðbjörn Jónsson, formaður

Ellert Scheving, framkvæmdastjóri ÍBV

Guðrún María Þorsteinsdóttir, meðstjórnandi

Hjörleifur Davíðsson, meðstjórnandi

Jón Þór Guðjónsson, meðstjórnandi

Daníel Frans Davíðsson, meðstjórnandi

Svanur Gunnsteinsson, meðstjórnandi

Alma Ingólfsdóttir, meðstjórnandi