Landsréttur hefur staðfest úrskurð Héraðsdóms Reykjavíkur þess efnis að konu verði gert að afplána eftirstöðvar fangelsisrefsingar (100 dagar) á grundvelli laga um fullnustu refsinga. Konan er sterklega grunuð um að hafa rofið skilyrði reynslulausnar sinnar með þátttöku í stóralvarlegu broti sem gæti varðað allt að 10 ára fangelsi.

Brotið átti sér stað á áfangaheimili í Reykjavík eldnsmemma að morgni þriðjudagsins 22. júlí. Par er þar grunað um líkamsárás, frelsissviptingu og byrlun. Eru þau sögð hafa þvingað ketamíni ofan í karlmann sem býr á heimilinu, misþyrmt honum í kjölfarið og stolið lyfjarúllunni hans.

Ásakanirnar eru studdar, auk framburðar brotaþola, gögnum úr myndeftirlitsbúnaði og framburði annarra íbúa í húsinu sem heyrðu gífurlegan hávaða, þar á meðal sársaukaóp mannsins, sem og vitnuðu um ástand hans eftir að parið hafði misþyrmt honum. Var maðurinn með skerta meðvitund eftir árásina og var fluttur á bráðamóttöku Landspítalans.

Einn íbúanna sem gáfu skýrslu í málinu sagði að parið hefði, eftir að hafa þvingað ketamíni ofan í manninn, kastað sjónvarpi í höfuð hans, sparkað í andlit hans, kýlt hann og slegið. Sagðist vitnið hafa vaknað við skerandi öskur í brotaþola.

Annar íbúi segir að brotaþoli hafi bankað hjá sér um kl. 5:30-6:00, umræddan morgun með „mexíkóskan pottrétt í andlitinu“. Sagði hann brotaþola hafa verið týndan og „alveg úti á túni“. Sagði hann brotaþola hafa greint sér frá því að ung kona og karlmaður hafi komið í íbúðina hans og gefið honum ketamín, hann hafi orðið ósjálfbjarga vegna áhrifa efnisins og þau hafi lamið hann. Sagði vitnið að unga konan væri nýkomin úr fangelsi.

Lögreglustjórinn í Reykjavík gerir kröfu um að konan afpláni 100 daga eftirstöðvar fangelsisrefsingar sem henni varð gerð vegna afbrots árið 2022. Byggir krafan á því að sterkur grunur leiki á um aðild konunnar að þessum brotum. Það er almennt skilyrði reynslulausnar að viðkomandi gerist ekki sekur um nýtt brot á reynslutíma.

Konan neitaði sök en framburður hennar var ekki talinn trúverðugur gagnvart öðrum gögnum málsins.

Úrskurðinn má lesa hér.