Ríkissaksóknari hefur úrskurðað að kæra á hendur starfsmönnum Vestmannaeyjabæjar vegna meðferðar á munum úr dánarbúi manns sem lést á heimili sínu í Vestmannaeyjum haustið 2023 skuli tekin til meðferðar hjá Embætti héraðssaksóknara. Kæran er frá vini hins látna og fyrirtæki vinarins vegna meintra stolinna muna sem hann segir hafa horfið við tæmingu íbúðarinnar, þar á meðal voru handofin austurlensk teppi.
Eftir að hafa fjarlægt lík mannsins af vettvangi og haldlagt tölvur og símtæki afhenti lögregla leigusalanum íbúðina sem hinn látni hafði búið í en leigusalinn var Vestmannaeyjarbær, og starfsmenn á hans vegum tæmdu íbúðina.
Vinur hins látna staðhæfir að verðmæti í eigu gamla mannsins og hans sjálfs hafi horfið við þessa tæmingu og ekki komið fram aftur. Segist hann hafa geymt verðmæti hjá þessum vini sínum sem eru horfin. Auk þess hafi þessi vinnubrögð verið ólögleg þar sem leigusamningar mannsins við bæinn hafi ekki rofnað við lát hans heldur hafi þær skuldbindingar færst yfir á dánarbúið.
Kærandi kærði upphaflega annars vegar vegna haldlagningar á síma í eigu hans úr íbúð mannsins og hins vegar vegna horfinna muna. Var lögregla kærð vegna símans en starfsmenn Vestmannaeyjabæjar vegna horfinna muna.
Héraðssaksóknari hóf rannsókn vegna kæru á hendur lögreglu en hætti henni síðan. Sú ákvörðun var kærð til ríkissaksóknara sem hefur þá kæru enn til meðferðar. Héraðssaksóknari vísaði síðan kæru á hendur starfsmönnum Vestmannaeyjabæjar til meðferðar hjá lögreglunni í Vestmannaeyjum.
Einn hinna kærðu, umsjónarmaður fasteigna í bænum, er faðir lögreglustjórans, Arndísar Báru Ingimarsdóttur. Af þeim sökum sagði hún sig frá málinu fyrr í sumar. Ríkissaksóknari hefur núna úrskurðað að sá hluti kærunnar sem lýtur að starfsmönnum bæjarins skuli fara til meðferðar hjá héraðssaksóknara, sem tekur ákvörðun um rannsókn og eftir atvikum ákæru. Auk föður lögreglustjóra er þar um að ræða þrjá aðra starfsmenn, þar á meðal framkvæmdastjóra fjölskyldu og fræðslusviðs.
Boltinn er nú hjá héraðssaksóknara en óljóst er á þessari stundu hvenær embættið tekur ákvörðun um framhald málsins sem hefur með einum eða öðrum hætti verið til meðferðar í kerfinu frá því maðurinn í Vestmannaeyjum lést fyrir tveimur árum.
