Séra Daníel Ágúst Gautason, prestur í Lindaprestakalli í Kópavogi, segir að Biblían hafi aldrei verið skrifuð með það í huga að vera fræðirit um kynvitund fólks á 21. öldinni og ekki ætti að nota hana sem viðmið fyrir læknisfræði í dag.
Þetta segir Daníel í aðsendri grein á Vísi í dag sem ber yfirskriftina „Á jaðrinum með Jesú.“ Fjallar hann um hugmynd um svokallaða gagnmenningu (e. counter culture). Það er sú menning sem kemur fram í þeim sem fara gegn samfélagslegum normum. Hugmynd sem er áberandi í til dæmis femínisma, hinsegin fræðum, hjá hippum og í pönki.
„Þrátt fyrir að ýmsar af þessum stefnum eru búnar að ryðja sér til rúms að einhverju leiti í dag, standa þær enn þá á jaðrinum. Þar standa þær og gagnrýna hin ríkjandi kerfi nútímans sem að einkennast oft af því að vera útilokandi og bælandi. Sem dæmi er gagnrýninni beint að efnishyggju, feðraveldinu, forræðishyggjunni, gagnkynhneigðishyggjunni, já og kirkjunni sjálfri,“ segir Daníel.
Daníel segir að Jesú hafi snúið upp á samfélagsleg viðmið þó að hugtakið gagnmenning hafi ekki orðið til fyrr en á sjöunda áratug síðustu aldar. Jesú hafi setið á meðal bersyndugra og tollheimtumanna. Hann hafi stuðlað að auðmýkt og hógværð, samfélagi þar sem hinir síðustu voru fyrstir. Hafi bent á hræsnina í því að halda því fram að við séum betri en einhverjir aðrir.
„Hugum að hinum útskúfuðu og kúguðu í samfélaginu í dag. Hver eru þau? Við getum talið upp marga hópa. Til dæmis trans fólk. Fólk sem þarf virkilega að berjast fyrir tilverurétti sínum og eiga í stöðugri hættu á að verða fyrir aðkasti og ofbeldi,“ segir Daníel og rifjar upp að þetta ár hafi byrjað með því að forseti Bandaríkjanna hafi undirritað lög þar sem aðeins tvö kyn voru samþykkt. Þetta sé aðför að fólki sem hafi verið til frá örófi alda.
„Ýmsir hafa viljað benda á Biblíuna sem rökstuðning fyrir þessu viðhorfi Bandaríkjaforseta, en við skulum öll gera okkur grein fyrir því að Biblían var aldrei, aldrei skrifuð með það í huga að vera fræðirit um kynvitund fólks á 21. öldinni, á sama hátt og við notum ekki Biblíuna sem viðmið fyrir læknisfræði í dag,“ segir Daníel. „Ég myndi allavega forðast eins og heitan eldinn skóla sem að myndi hafa einn af riturum Biblíunnar sem kennara í kynfræðslu eða kynjafræði í dag.“
En boðskapurinn um að hinir síðustu verði fyrstir sé einmitt boðskapur sem við þurfum á að halda í dag. Að við séum kölluð til að þjóna öðrum af auðmýkt og huga að þörfum annarra. Það er að þjóna þeim sem virkilega þurfa á því að halda.
„Jesús minnir okkur á að hvert og eitt okkar er mikilvægt og dýrmætt,“ segir Daníel að lokum. „Við erum kölluð til auðmýktar í sjálfshælandi samfélagi. Við erum kölluð til þjónustu í eigingjörnu samfélagi. Við erum kölluð til örlætis í gráðugu samfélagi. Og í einstaklingsmiðuðu samfélagi erum við kölluð til samfélags. Þegar við göngumst undir þessi hlutverk þá fáum við einmitt vott af því samfélagi sem við viljum búa í, kærleiksríku og umburðarlyndu samfélagi.“
