Hegðun margra erlenda ferðamanna á þjóðvegum Íslands er sögð svívirða og skapa hættu. Við Landmannalaugar náðist ljósmynd af bílaleigubíl sem var lagður úti á miðri götu, á móti umferð, með opna hurð og ferðamennirnir voru að spóka sig í vegkantinum.
„Á röngum vegarhelmingi, með hurðina galopna og alveg sama um allt. Við vorum næstum búin að klippa hurðina af bílnum þegar við keyrðum fram hjá þeim. Ég þurfti að öskra á þá til að loka hurðinni,“ segir sá sem tók ljósmyndina, nálægt Landmannalaugum fyrir skemmstu, á samfélagsmiðlinum Reddit. „Af hverju heldur fólk að það eigi rétt á þessu?“ spyr hann.
Þetta er ekki í fyrsta eða eina skiptið sem ökulag erlendra ferðamanna á Íslandi hefur komið til tals. Ekki er óalgengt, sérstaklega á sumrin, að sjá þá leggja út í kant eða hreinlega á miðjum þjóðvegum. Sjaldgæfara er þó að þeir leggi á móti umferð og með bílhurðina opna út á hinn helminginn.
„Ég velti því fyrir mér hvort að það ætti ekki að sýna ferðamönnum sem fljúga til Íslands fræðslumyndband í flugvélinni með leiðbeiningum fyrir ferðamenn?“ spyr einn í fjörugum umræðum um málið. „Við erum sífellt að ræða um sama málið, slæma hegðun ferðamanna.“
Aðrir hafa takmarkaða trú á að slíkt myndi duga. Meðal annars er nefnt að ökuráð séu sýnileg hjá bílaleigunum, meðal annars þeirri bílaleigu sem þessi tiltekni bíll var leigður hjá.
„Það segir greinilega að fólk eigi ekki að stöðva bílinn út á miðjum vegi. Þó það ætti nú reyndar að vera almenn vitneskja að gera það ekki,“ segir einn. „En ég býst við því að ef þú ert þannig manneskja sem leggur bílnum úti á miðjum vegi með engri vegöxl þá ertu sennilega ekki manneskja sem lest öryggisráð.“
„Þetta er gagnslaust. Ef þú ert með ökuréttindi þá áttu að vita að haga þér ekki á þennan hátt,“ segir annar. „Þetta er afleiðing hrokafulls oftúrisma yngri kynslóðarinnar.“
„Ég er svo ánægður að hafa farið utan mesta annatímans,“ segir annar sem kennir veðrinu um. „Við mættum sárafáum bílum úti á miðjum vegi, þaðan af síður lögðum bílum. Það er eins og heitara veður dragi fram það versta í fólki á öllum ferðamannastöðum.“
Einhverjir reyna þó að afsaka þessa hegðun eða segja að hún sé skiljanleg.
„Getur verið að vegna þess hvernig vegirnir eru gerðir og mikillar víðáttu sem fólk líti á þetta sem víðavang?“ spyr einn. „Að fólk beinlínis viti ekki hveru mikil vanvirðing þetta sé í öðru landi. Það er að í þeirra landi sé þetta venjulegt og umborið.“
„Við vorum með sömu tegund af Kia á leigu á Íslandi fyrir nokkrum mánuðum og hún bilaði úti á vegi eins og þarna, þessi er sennilega bara biluð,“ segir annar.
