Þann 7. júlí síðastliðinn fannst Roman Starovoyt, fyrrverandi samgönguráðherra Rússlands, látinn í Tesla-bifreið sinni í úthverfi Moskvu aðeins nokkrum klukkustundum eftir að hann lét af embætti. Dánarorsökin var byssuskot í höfuðið og við hlið valdamannsins fannst einkennilega skrautleg skammbyssa.
Andlát Starovoyt var úrskurðað sem sjálfsvíg en það leggja fáir trúnað á. Sér í lagi í ljósi óstaðfestra frétta um að á líkama ráðherrans fyrrverandi hafi mátt greina ummerki eftir nýafstaðnar barsmíðar.
Roman Starovoyt var heldur ekki sá eini sem lést með dularfullum hætti þennan dag. Andrei Korneichuk, háttsettur embættismaður í járnbrautarrekstri og náinn samstarfsmaður Sarovoyt, dó nokkrum klukkustundum síðar með dularfullum hætti . Korneichuk var 42 ára gamall en hann er sagður hafa fallið skyndilega niður á fundi, örendur.
Margir efast um að þessi tvö dauðsföll séu tilviljun.
Opinbera skýringin á þeirri ákvörðun Starovoyt, valdamikils auðkýfings, að svipta sig lífi var sú að hann hafði verið ríkisstjóri í Kursk-héraði áður en hann reis til æðri metorða. Þar er hermt að átt hafi sér stað gróf misnotkun á opinberu fé, sem átti að fara í varnir héraðins en endaði í vösum óprúttina aðila. Spilaborgin var sögð vera að falla í kringum Starovoyt og því hafi hann ákveðið að flýja þessa jarðvist.
Aðrir telja að einhver hafi þurft að axla ábyrgð á því hversu auðveldlega Úkraínumenn náðu Kursk á sitt vald á síðasta ári.
Frá því að innrásin í Úkraínu hófst hefur fjöldi andláta meðal háttsettra embættismanna, auðkýfinga og stjórnarsinna í Rússlandi vakið athygli og grunsemdir. Þeir sem falla í ónáð hjá forseta Rússlands, Vladimír Pútín, virðast gjarnan hverfa af sjónarsviðinu með dularfullum hætti.
Á sérstakri Wikipediu-síðu, þar sem haldið er utan um lista af þessum dularfullu dauðsföllum, stendur fjöldinn í tæplega 80 manns frá því að innrásin hófst. Í byrjun júlí féll til að mynda varaforseti ríkisolíufyrirtækisins Transneft, auðkýfingurinn Andrei Badalov, út um glugga í Moskvu. Andlát hans var einnig úrskurðað sem sjálfsvíg.
Ýmsir valdamenn innan rússneska stjórnkerfisins eru sagðist stressaðir vegna málsins. Þeir vita sem er að þeir gætu verið gerðir að blórabögglum ef eitthvað fer úrskeiðis. Þyngsta refsingin í slíkum málum gæti orðið skyndilegur dauði.
