Fyrirtækið Borgarhraun ehf. lagði í maí fram fyrirspurn vegna breytingar á deiliskipulagi vegna Laugavegar 72.

Lagði eigandi fram fyrirspurn um að byggja tveggja hæða, 10 herbergja gistihús með lágu risi á baklóðinni. Samkvæmt teikningu Zeppelin arkitekta á að vera garður milli suður lóðamarka og nýbyggingar, og framhús og bakhús tengd saman með byggingu upp við húsið á Laugavegi 74 og á milli framhúss og bakhúss verður húsasund, eða garður. 

Áður hafði svipuð fyrirspurn verður lögð fram vegna lóðarinnar, þar sem óskað var eftir að sameina Laugaveg 72 og 74, henni var hafnað þar sem byggingamagn í bakgarði þótti ekki falla að gildandi byggðamynstri.

Í þeirri nýju sem tekin var fyrir á afgreiðslufundi skipulagsfulltrúa 3. júlí var fallið frá sameiningu lóða, en eins og áður sagði snýr nýja fyrirspurnin að leyfi til að byggja á baklóð og tengja byggingarnar.

Fasteignin að Laugavegi 72 er í heild 282,7 fm og var kaupsamningi vegna hennar þinglýst 5. júní. Kaupverð var 233,5 milljónir króna.

Í svari skipulagsfulltrúa kemur fram að markmið gildandi deiliskipulags er meðal annars að vernda byggðamynstur miðborgar. Gildandi deiliskipulag gerir ráð fyrir töluverðri uppbyggingu við Laugaveg, sem felst í heimildum til að stækka verslunarrými á jarðhæðum að lóðamörkum til suðurs ásamt útbyggingu baka til. Þar sem viðbygging í bakgarði er heimil einungis á jarðhæð er upprunaleg rýmd milli húsa varðveitt og þar með byggðamynstur. Fyrirspurn eiganda þykir í ósamræmi við megin einkenni byggðarmynsturs hvað varðar rýmd milli húsa.

Einnig kom fram að ekki er heimild fyrir því að breyta núverandi húsnæði í gististarfsemi. Hvað nýja uppbyggingu varðar sé það mögulegt í ákveðnu hlutfalli skerði slík starfsemi ekki gæði, stærð eða magn núverandi húsnæðis sem er fyrir.

Þar sem fyrirspurnin sneri að því að uppbygging yrði 100% gististarfsemi var ekki fallist á hana.

Niðurstaða 

Tekið er neikvætt í fyrirspurn þar sem tillaga samræmist ekki ákvæðum Hverfisverndar innan Hringbrautar eða markmiðum gildandi deiliskipulags um verndun byggðamynsturs, né uppfyllir hún skilyrði AR2040 fyrir aukinni gististarfsemi á miðsvæði M1a. 

Vakin er athygli á að fyrirspurn um afstöðu skipulagsfulltrúa til erindis byggir á innsendum gögnum og verður ekki lögð að jöfnu við formlega umsókn og svar í slíku tilfelli getur eðli máls samkvæmt ekki talist stjórnvaldsákvörðun. Afgreiðsla skipulagsfulltrúa á fyrirspurnum felur því ekki í sér lokaákvörðun og veitir ekki heimild til framkvæmda.