Flugdólgur var handtekinn eftir flug Wizz frá Keflavík til borgarinnar Gdansk í Póllandi. Maðurinn er talinn hafa verið undir áhrifum og olli vandræðum gagnvart bæði öðrum farþegum og áhöfn.
Flugdólgurinn er 35 ára pólskur karlmaður, búsettur í borginni Wloclawek, eins og kemur fram í pólska miðlinum Strazgraniczna. Hann var handtekinn eftir óspektir í farþegaflugvél á leið frá Keflavík til Gdansk á mánudag, 2. júní.
Flugturninum á Lech Walesa flugvellinum í Gdansk var gert viðvart um að maður væri með dólgslæti í flugvélinni og að áhöfnin þyrfti aðstoð eftir lendingu. Biðu fulltrúar flugvallarlögreglunnar eftir honum við lendingu.
Flugstjórinn greindi frá því að maðurinn væri sennilega undir áhrifum áfengis. Einnig að hann væri að valda öðrum farþegum og áhöfn truflun. Þá hlýddi hann ekki fyrirmælum áhafnarinnar.
Eftir handtöku var maðurinn settur beint í áfengispróf og mældist í honum 3,65 prósent alkóhólmagn. Var farið með hann rakleitt í sérstaka neyðarvistun fyrir fólk með mikinn áfengisvanda. Einnig var hann sektaður fyrir uppákomuna en upphæðin er ekki tiltekin.
