Fjórir voru handteknir eftir að bíll endaði inni í verslun í miðborginni í nótt. Voru allir mennirnir vistaðir í fangageymslu í þágu rannsóknar málsins. Rannsóknin snýr meðal annars að því að rannsaka hver var að aka bílnum þegar hann endaði inni í versluninni.

Þetta kemur fram í dagbók lögreglu. Þar segir einnig frá því að maður braust inn í fyrirtæki í gærkvöld en yfirgaf vettvang þegar hann áttaði sig á því að það var fólk þar innandyra. Hann fannst stuttu síðar þar sem hann var að reyna að brjótast inn í bíl, hann var þá handtekinn. Hann var fluttur á lögreglustöð þar sem hann var vistaður í klefa í þágu rannsóknar.

Tilkynnt var um umferðaróhapp þar sem ökumaður á rafmagnshlaupahjóli féll af hjólinu. Lögregla fór á vettvang ásamt sjúkraliði.

Eldur kviknaði í íbúð miðsvæðis og fóru slökkvilið og lögregla á vettvang. Eldurinn var minniháttar en það kviknaði í frá eldhúsrúlluhaldara.