Ekki er talið að nokkur hafi lifað af hið skelfilega flugslys sem varð á Indlandi í morgun þegar vél Air Aindia af gerðinni Boeing 787-8 Dreamliner brotlenti skömmu eftir flugtak frá borginni Ahmedabad.

Vélin var á leið til Gatwick-flugvallar í London en alls voru 242 farþegar um borð; 169 Indverjar, 53 Bretar, sjö Portúgalar og einn Kanadamaður. Ellefu þeirra sem um borð voru börn, þar af tvö kornabörn. Um borð voru einnig tveir flugmenn og tíu manna áhöfn.

Sjá einnig: Alvarlegt flugslys í Indlandi – Full vél á leið til London Gatwick brotlenti

G.S. Malik, lögreglustjóri á svæðinu, segir útlit fyrir að enginn hafi lifað slysið af. Aðgerðir hafa staðið yfir síðustu klukkustundirnar og hafa minnst 30 lík fundist.

Vélin brotlenti í íbúðabyggð og segir Malik útlit fyrir að margir á jörðu niðri hafi einnig látist í slysinu.

„Skrifstofan okkar er nálægt byggingunni sem vélin brotlenti á. Við sáum fólk stökkva af 2. og 3. hæð hennar til að bjarga sér. Vélin var alelda,“ hefur Mail Online eftir íbúa á svæðinu.

Rannsókn á tildrögum slyssins er á frumstigi en á myndböndum á samfélagsmiðlum má sjá þegar vélin lækkar hægt og rólega flugið uns hún brotlendir á jörðu niðri. Þar sem vélin var stútfull af eldsneyti braust út mikið eldhaf eftir slysið. Gögn sýna að vélin var í 825 feta hæð, liðlega 250 metra, þegar hún byrjaði skyndilega að lækka flugið.