Borið hefur á því að fullorðnir erlendir ferðamenn stoppi á leikvöllum til þess að taka myndir fyrir samfélagsmiðla. Þeir teppa leiktækin sem ætluð eru fyrir börn og þola oft ekki þyngd fullorðins fólks.
„Ég er að heimsækja Ísland með ungum börnum og því stoppa ég oft á leikvöllum. Ég hef oft tekið eftir hópum af ferðamönnum á völlunum sem einoka tækin fyrir sjálfa sig til þess að taka ljósmyndir,“ segir hneykslaður ferðamaður á samfélagsmiðlinum Reddit. Spyr hann hvort það sé ekki talið ókurteisi á Íslandi að barnlaust fólk teppi leiktæki á leikvöllum.
„Þeir hlaupa að leiktækjunum, leika sér á þeim og fá félaga sína til þess að taka myndir. Svo skiptast þeir á. Þeir yfirtaka leiktækin í langan tíma,“ segir hann.
Er hann hreint ekki hrifinn af þessari hegðun því hún hindrar börn í að geta leikið sér í tækjunum.
„Mér finnst þetta alveg ótrúlega dónalegt þar sem það eru yfirleitt ung börn að reyna að nota leikvöllinn. Það eru ekki mörg leiktæki á leikvöllunum og búnaðurinn virðist vera sérhannaður fyrir börn á leikskólaaldri og yngri deildir grunnskólans. Þess vegna er það þeim mun tillitslausara hjá fullorðnum að vera að teppa tækin fyrir krökkunum,“ segir ferðamaðurinn.
Nefnir ferðamaðurinn að hann hafi orðið vitni að þessu síðast í gær, þriðjudag. Þá hafi það verið hópur af Ítölum að skemma fyrir krökkunum.
„Í gær sá ég hóp af fullorðnum Ítölum gera þetta. Öll íslensku börnin stoppuðu, störðu og biðu þangað til tækin losnuðu,“ segir hann. Einnig hafi hann séð hópa frá Kóreu og Ísrael gera börnum þennan óleik.
Hafa um þetta skapast umræður, bæði á meðal Íslendinga og útlendinga, og sitt sýnist hverjum.
„Ég er frá öðru landi, en í mínu landi eru leiktæki ekki gerð til þess að bera þyngd fullorðins fólks (og það eru skilti sem sýna það). Já, því myndi ég segja að þetta sé dónaskapur,“ segir einn.
Aðrir nefna að það ætti að láta svona fólk heyra það. „Ég bý á Íslandi með fjölskyldu minni, með tveimur litlum börnum, og ef ég myndi sjá svona lagað ætti ég ekki í neinum vanda með að segja þeim að andskotast af leiktækjunum. Ég meina í alvöru! Hver gerir svona lagað?“ spyr hneykslaður Íslendingur.
„Í hvert skipti sem ég sé fullorðna ferðamenn að bjánast á leiktækjum barna á leikvöllum þá minni ég þá kurteisislega en ákveðið á að tækin eru ekki smíðuð fyrir fólk í þeirra þyngd og að þau ættu ekki að eyðileggja þetta fyrir börnunum,“ segir annar.
Ekki eru þó allir sammála um að þetta sé dónaskapur. Að minnsta kosti ekki dónaskapur sem sé það alvarlegur að það þurfi að gera úr því mál.
„Þú ert að heimsækja ótrúlega fallegt land. Hvers vegna að einblína á eitthvað sem þú getur ekki stjórnað? Njóttu bara frísins og láttu þetta eiga sig,“ segir einn. „Ferðamenn verða alltaf ferðamenn!“
„Vinsamlegast tilkynntu þetta mannréttindabrot til sendiráðsins þíns,“ segir einn með hæðnistóni.
