Landsréttur staðfesti á miðvikudag dóm Héraðsdóms Suðurlands yfir Ómari Jóhannssyni, eiganda hins gjaldþrota byggingafyrirtækis Omzio ehf. en hann var dæmdur í átta mánaða skilorðsbundið fangelsi.

Omzi var byggingafyrirtæki sem hafði aðsetur í Hveragerði. Fyrirtækið var úrskurðað gjaldþrota árið 2019 og skiptalok urðu árið eftir. Lýstar kröfur í þrotabúið voru tæplega 223 milljónir króna að viðbættum vöxtum og kostnaði. Forgangskröfur voru tæplega 34 milljónir. Engar eignir fundust í búinu og lauk skiptum án þess að nokkuð fengist upp í kröfur.

Þremur árum eftir skiptalokin var Ómar ákærður fyrir meiriháttar brot gegn skattalögum í rekstri þess. Var Ómar sakaður um að hafa ekki staðið rétt að skilum á virðisaukaskattskýrslum vegna reksturs félagsins árið 2018 og var vangoldinn virðisaukaskattur rúmlega 16,3 milljónir króna. Ennfremur var Ómar sakaður um að hafa ekki staðið skil á staðgreiðslu opinberra gjalda fyrir árið 2018 og fyrir janúar 2019. Vangoldinn skattur var samtals rétt rúmlega 18 milljónir króna og skattsvikin námu því samtals rúmlega 34,4 milljónum króna.

Sem fyrr segir staðfesti Landsréttur skilorðsbundinn fangelsisdóm yfir Ómari en lækkaði sektargreiðslu hans til ríkissjóðs. Héraðsdómur hafði dæmt hann í 85 milljóna króna sekt en Landsréttur lækkar upphæðina niður í 75 milljónir.

Dóminn má lesa hér.