Jóhann Scott Sveinsson, þrjátíu og eins árs gamall Íslendingur, hefur játað sök í tveimur ákæruliðum varðandi vörslu og dreifingu barnaníðsefnis í bænum Abbotsford í Bresku-Kólumbíu í Kanada. Annars vegar var um að ræða ákærulið um dreifingu barnaníðsefnis í júní 2022 og síðan varsla slík efnis í maí 2023.  Jóhann tók ekki afstöðu til þriðja ákæruliðsins um dreifingu slík efnis sem átti að hafa átt sér stað í janúar 2023.

Þetta kemur fram á fréttavefnum Abbotsfords News en aðalmeðferð í máli Jóhanns Scotts fer fram þann 15. febrúar næstkomandi.

DV hefur fjallað ítarlega um mál Jóhanns Scotts, sem á íslenskan föður en skoska móður. Jóhann hefur starfað við kvikmyndagerð ytra, sem og á Íslandi, en samkvæmt erlendum miðlum er hann ekki grunaður um að hafa framleitt barnaníðsefni heldur leita eftir slíku efni á netinu, hala því niður og dreifa því áfram í lokuðum nethópum.

Sér í lagi var um að ræða efni sem sýndi mæður misnota syni sína kynferðislega og eru þolendurnir börn undir tíu ára aldri. Jóhann mun hafa tjáð eiginkonu sinni að hann sé ekki haldin barnagirnd heldur sé hann kynlífsfíkill og sú fíkn hafi stigmagnast og leitt hann út á þessar brautir.

Í kjölfar þess að Jóhann Scott var handtekinn við rannsókn málsins og yfirheyrður þá lét hann sig hverfa úr Abbotsford. Er hann sagðust hafa flutt í snarhasti með íslenskri eiginkonu sinni og barni til bæjarins Stoney Plain, sem er innan Edmonton-héraðs í Alberta-ríki Kanada. Svæðið mun vera utan lögsögu lögreglu í heimabæ Jóhanns, Abbotsford.

Hefur hann síðan ákveðið að snúa tilbaka og svara til saka fyrir dómstólum.

Jóhann Scott starfaði um skeið hjá Linus Media Group, sem rekur eina stærstu Youtube-síðu heims, Linus Tech Tips, sem einbeitir sér að því að fjalla um og gagnrýna nýjungar varðandi tölvur og hverskonar tækni. Fyrirtækið hefur orðið fyrir barðinu á röð hneykslismála og var mál Jóhanns Scotts eitt þeirra.