Evrópusambandið hefur lýst yfir áhyggjum af nýju samkomulagi um makrílveiðar fjögurra strandveiðiríkja í Norður-Atlantshafi, þar á meðal Íslandi. Heildarveiðar á makríl muni fara langt yfir það sem stofninn þoli.
Um miðjan mánuðinn var greint frá því að Ísland, Noregur, Bretland og Færeyjar hefðu náð samkomulagi um skiptingu og stjórn makrílstofnsins. Evrópusambandið og Grænland voru ekki hluti af þessu samkomulagi. Heldur ekki Rússland, en samskipti við Rússa hafa verið í lamasessi frá árás þeirra inn í Úkraínu árið 2022.
Hlutur Íslands er 12,5 prósent og mun Ísland geta veitt í bæði norskri og færeyskri lögsögu. Ísland hefur ekki átt aðild að samkomulagi strandveiðiríkja um makríl veiðar en fyrir höfðu Norðmenn, Bretar og Færeyingar gert samkomulag.
Framkvæmdastjórn Evrópusambandsins hefur lýst yfir áhyggjum af samkomulaginu og segir það grafa undan sjálfbærni makrílstofnsins í Norður Atlantshafi.
Ofveiði hafi verið mikil um langt skeið. Alþjóða hafrannsóknastofnunin (ICES) hafi mælt með því að ekki yrði veitt meira en 174 þúsund tonn úr stofninum á árinu 2026. Ríkin fjögur hafi sett sér kvóta upp á 299 þúsund tonn, það er 72 prósentum yfir því sem ICES mælir með.
Þá er ótalin veiði Rússa sem nemur um 100 þúsund tonnum og er heildarveiðin því um 400 þúsund tonn.
„Þessi mikli þrýstingur hefur í för með sér verulega hættu á óafturkræfum skaða á makrílstofninum og stofnar lífsviðurværi þeirra sem eru háðir honum í hættu,“ segir sambandið.
