Landsréttur hefur staðfest sektardóm Héraðsdóms Reykjaness yfir manni á þrítugsaldri fyrir kynferðislega áreitni og barnaverndarlagabrot en manninum var gefið að sök að hafa ítrekað á tímabilinu desember 2021 til janúar 2022 sent 15 ára stúlku nektarmyndir af sér þar sem ber getnaðarlimur hans sást. Myndirnar voru sendar í gegnum samskiptaforritið Snapchat.

Maðurinn neitaði sök og sagðist hafa verið símalaus á tímabilinu sem myndirnar voru sendar stúlkunni og því hafi hann ekki getað sent þær. Myndirnar voru samtals vel á þriðja tuginn. Framburður mannsins um símaleysi þótti ótrúverðugur, ekki síst vegna þess að hann greindi ekki frá því í skýrslugjöf til lögreglu að síminn hans hefði glatast.

Maðurinn er 29 ára í dag en var 25 ára er brotin voru framin. Í dómi Landsréttar kemur fram að hann hefur verið greindur með ódæmigerða einhverfu, væga þroskahömlun og athyglisröskun með ofvirkni. Hann er engu að síður sakhæfur.

Maðurinn var dæmdur í tveggja mánaða skilorðsbundið fangelsi og til að greiða stúlkunni 250 þúsund krónur í miskabætur.

Dóma Landsréttar og héraðsdóms í málinu má lesa hér.